تجربة رحلة إلى أسكندرية يوم واحد فقط بأقل تكاليف مُمكنة بالتفصيل

تجربة رحلة  إلى أسكندرية يوم واحد فقط بأقل تكاليف مُمكنة بالتفصيل
    أسكندرية عروس البحر المتوسط، واحدة من أجمل المُدن المصرية ولا جدال في هذا على الإطلاق
    لأسكندرية سحر خاص والذهاب إلييها مُتعة لا يعرفها من لم يذهب إليها من قبل
    في هذا المقال جمعت لكم مجموعة من تجارب المسافرون المصريين 
    ومجموعة من تجارب رحلات اليوم الواحد فقط إلى الأسكندرية 
    أي أن مجموعة من الأشخاص يرشدونك كيف يُمكنك أن تقضي يوم واحد مميز في الأسكندرية 
    أو كما نقول بالعامية المصرية "صد رد" 
    سنتحدث عن أفضل المطاعم، وأفضل الشواطئ، وثمنها وأسعارها
    لكن في الحقيقة، لستُ أنا من سيتحدث أو من سينقل تجربته هذه المرة
    فأنا أنقل لكم التجارب فقط، لأنني لستُ خبرة في السياحة ولا الذهاب إلى الأمكان السياحية، على الرغم من كوني 
    من المُفترض إنني على أعتاب أن أكون مُرشد سياحي "خليها في سرك" 
    وحتى لا أطيل عليكم بثرثرة مُرشد سياحي لا جدوى منه
    سأقترح عليك قراءة هذا الموضوع، ثم سأصمت إلى نهاية المقال.
    تكلقة الذهاب إلى الأسكندرية من القاهرة - تكلفة الذهاب إلى الأسكندرية - رحلة إلى أسكندرية بدون تكاليف - تكاليف المرواح لأسكندرية - هل الذهاب إلى الأسكندرية مُكلف - هل يُمكن الذهاب إلى الأسكندرية بتكاليف بسيطة - رحلة أسكندرية بتكاليف بسيطة
    تجربة رحلة  إلى أسكندرية يوم واحد فقط بأقل تكاليف مُمكنة بالتفصيل 

    تجربة الذهاب إلى الأسكندرية ليوم واحد بطريقة غير مُكلفة - تجربة معتز محمد

    في ناس كتير بتنزل يوم اجازتها تروح تقعد في كافيه او مطعم ساعتين تلاته و تدفع ١٠٠ و ١٥٠ و اكتر من كده و يرجع البيت و يحس انه مغيرش جو و عمل حاجه مفيده و يرجع الشغل او الدراسه و يحس بزهق و روتين يومي.
    طيب ممكن نعمل ايه و بردوا حاجه مش مكلفه و ممكن تعملها لوحدك؟؟
    انت ممكن تحجز قطار لاسكندريه درجه تانيه مكيفه ب ٣٠ جنيه و ده بيقوم من القاهره ٨:١٥ صباحا و ده اقل سعر موجود
    بياخد حوالي ٣ ساعات عشان بيقف في حوالي ٥ محطات و بيوصل تقريبا علي ١١:٣٠ محطه سيدي جابر.


    تنزل محطه سيدي جابر و هتلاقي قصادك علي بعد ٣ دقائق من المحطه القطار هتلاقي محطه الترام هناك.
    اركب اتجاه جليم و هتلاقي التذكره ب ٥٠، قرش و قول لكمسري عايز انزل عند متحف قصر المجوهرات.
    هتلاقي تقريبا ٦ محطات.
    تنزل هتتمشي ٥ دقايق لقصر هتدفع تذكره دخول 20 جنيه.
    هتتفرج علي مقتنيات من ذهب و فضه خاصه بالملوك و الامراء الي حكموا مصر و هتلاقي شرح لكل حاجه علي الزجاج الي معروض عليه المقتنيات.
    المتحف ده يخلص في ٤٠ دقيقه.
    و بعد كده تخرج تتمشي لاتجاه البحر و تعدي الشارع لحد ما يكون البحر علي يمينك.
    اركب ب ١.٥٠ مشروع (ميكروباص) لمكتبه الاسكندريه
    هتنزل تدخل المكتبه ب ٥ جنيه و هناك هتتفرج علي منظر في منتهي الروعه و لو محتاج النت في حاجه بيكون مجانا و الواي فاي مجانا و هتلاقي مرشدات بيعملوا جوله مجانا بترحلك بالعربي فكره المكتبه.
    هتاخد حوالي ساعه جوله داخل المكتبه.
    بعد اما تخلص هتلاقي قبه شبه الكوره الارضيه هناك و ديه بيتعرض فيها افلام وثائقيه في منتهي الجمال و بتتعرض في شكل ٣٦٠° درجه يعني بتحس انك جوه الفيلم و بيكون الشرح عربي.
    سعر التذكره بيكون ٢٠ جنيه و بيكون مده الفيلم من ٢٠ الي ٣٠ دقيقه حسب الحفله الي انت داخلها و بيكون ليها مواعيد.
    انا دخلت اخر حفله من الساعه ٣ و كانت اسمها عجائب الدنيا السابعه القديمه و الحديثه.
    المكان بيقفل ٤ مساءا يوم السبت.
    بعد اما تخلص اركب برده المشروع من ناحيه البحر الي منطقه بحري و انزل عند المرسي ابو العباس و و ادي لسواق ٢ جنيه.
    انزل عند الجامع بالظبط و اتجه ناحيه الجامع و انزل يمين هتلاقي مطعم حلو جدا لاسماك اسمه عروس البحر.
    و ده هتلاقي قعدته حلوه و السمك طازه.
    اطلب سمكه بوري سنجاري و شوربه سي فود و هينزل ٧ اطباق سلطات بالعيش السخن و اطلب شوربه جمبري احمر في كبايه و ديه البهاريز كلها😍😍 و الاكله ديه تكلفتها مش هتزيد عن ٧٦ جنيه.
    شامله نص كيلوا سمك بوري سنجاري ٣٥ جنيه
    شوربه سي فود ٣٠ جنيه
    السلطات بينزلك ٧ اطباق مختلفه و هيحسبك ب ١٠ جنيه بس عليهم كلهم مش علي كل طبق فلو معاك حد كل واحد ٥ جنيه
    و معاهم ٥ ترغفه مولعين
    و عليهم ٥٪ ضريبه ٧٦ جنيه بالظبط
    شوربه جمبري احمر ببلاش بس اطلبها منهم عشان مش هتنزل لو مطلبتش.
    خلص و اركب مشروع مطرح ما نزلت و قول لسواق عايز انزل عند الشيخ وفيق و ادي لسواق ٥٠, قرش و هينزلك اخر المحطه.
    و ده من اشهر المحلات في الاسكندريه و ده بيعمل كسكسي و رز بلبن و ام علي و ايس كريم.
    الكسكسي بالسكر و معاه كبايه لبن ٩ جنيه
    الرز بلبن و المكسرات ب ١٣ جنيه بس خليه يحطلك ايس كريم عليها.
    بعد اما تخلص اركب المشروع و انزل عند كبري استنلي و اتمشي شويه عليه او اقعد علي قهوه سلطانه الي هناك.
    اعمل حسابك تركب من نفس المكان الي نزلت منه المشروع الي رايح سيدي جابر.
    هينزلك بره علي الشارع الرئيسي و هتتمشي لمحطه حوالي ١٠ الي ١٥ دقيقه.
    احجز قطر الرجوع و عندك ٣ قطارات راجعه الي القاهره.
    مواعدهم :
    ٨:٠٠
    ٨:٢٠
    ٩:٣٠
    احجز درجه تانيه مكيفه بنفس السعر ٣٠ جنيه او هتلاقي في قطار ٨:٢٠ درجه اولي ب ٥١ جنيه.
    رحله زي كده لو حسبتها مش هتكلفك اكتر من ١٢٠ جنيه و هترجع مبسوط و مغير جو.
    طبعا احب من خلال البوست ده اشكر الرحاله الاسكندراShaymaa Ali Alili
    الي كانت بالنسبالي GPS تحركاتي في اليكس و شرحتلي ازاي اتحرك هناك عشان اوفر وقت و مجهود عشان استمتع بوقتي.
    لينك البوست للمتابعة : تجربة الأسكندرية يوم واحد

    برنامج رحلة غير مُكلفة للأسكندرية يوم واحد - تجربة معتز محمد الجزء الثاني 

    كنت اتكلمت في الجزء الاول لرحلتي لاسكندريه انك ممكن تقعد في كافيه او مطعم ٣ ساعات و تصرف اكتر من ١٥٠ جنيه علي كلام فاضي و ممكن تنبسط و ممكن لأ بس في الاخر احنا كقاهريين عايشين في ضغط عصبي و زحمه و تلوث عشان كده سرعان ما هتحس انك عايز تخرج تاني و تالت عشان تغير جو فهتصرف مرتبك في١٥ يوم علي ولا حاجه.
    عشان كده قررت الفتره الاخيره اعمل رحلات اقتصاديه تفيد الناس و تخليها تستمتع و تطلع بره الحياه الروتينيه الي احنا فيها.
    النهارده هتكلم عن تاني برنامج ليا لمدينه الاسكندريه الي مينفعش الواحد يزهق منها حتي لو كررها ١٠٠ مره بنفس البرنامج عشان كده كل فتره هعمل برنامج جديد نقدر بيه نلف الاسكندريه و نتمتع بيها.
    لو انت عايز تستمتع بالاسكندريه و مش عايز تشيل هم السواقه و الركنه و الزحمه فبلاش تطلع بالعربيه و استمتع بالقطار و التمشيه علي قد ما تقدر.
    كل حاجه في الرحله ديه متصوره بالاسعار عشان الناس الي مش بتصدق ان الاسعار ديه موجوده دلوقتي بعد غلو كل الاسعار حولينا و لازم اكد ان الرحله تناسب العائلات و الناس الي بتحب التصوير جدا 😉
    تفاصيل رحله الاسكندريه يوم ٢٤/٣/٢٠١٧
    **القطار
    يفضل تحجز قبلها بيومين عشان تلاقي حجز علي قطار الدرجه التانيه بتاع الساعه ٨:١٥ صباحا و ده ميعاد ثابت يوميا و قطار نظيف جدا سعر التذكره ٣٠ جنيه و بياخد حوالي ٣ ساعات عشان بيقف في محافظات و ده بيوصل محطه الاسكندريه علي الساعه ١١:١٥ تقريبا.
    القطار الي بعده مباشر الاسكندريه بيتحرك الساعه ٩ صباحه و سعر التذكره درجه تانيه ٤٥ جنيه و بيوصل علي ١١:٣٠
    ناخد بالنا و احنا راكبين ان كل القطارات بتقف في محطه سيدي جابر فالناس بتتلغبط و تنزل فيها بدل محطه مصر بتاعه الاسكندريه.
    احجزوا التذكره رايح جاي من القاهره عشان تامن نفسك خصوصا لو بنات.
    انا حاطت في الصور مواعيد العوده من الاسكندريه و بالاسعار
    انا حجزت عوده ٩:٣٠ مساءا و ده خط محافظات بيقف في طنطا و دمنهور و بيوصل القاهره في ٣ ساعات
    سعر التذكره درجه تانيه ٣٠ جنيه بس هتحس ان مستواه اقل شويه بس بيقوم بالواجب و مكيف 😃
    خدوا بالكم ان مكاتب الحجز بتاعت القطارات الي بتكون موجوده في السنترالات اغلي ٣,٥٠ و علي النت اغلي ١,٥٠.
    ** مسار الرحله
    اول ما بتخرج من محطه قطار مصر في الاسكندريه امشي يمين ٥ دقائق هتوصل لمنطقه اسمه كوم الدكه و كده انت وصلت لاول مزار و هو المسرح الروماني و ده سعر التذكره ١٠ جنيه هتدخل تتفرج علي المسرح و تتصور هناك و غالبا هتقد ٤٥ الي ٦٠ دقيقه داخل المكان.
    هتخرج من المسرح و تمشي ناحيه اليمين ٥ دقائق هتوصل لسوق الشعبي و عن السنترال في المنطقه و من هناك اطلع علي شارع اسمه عبد المنعم و اسال عن مطعم اسمه البغدادي و ده مطعم شعبي بتاع فول و طعميه و اطلب سندوتشين طعميه اسكندراني و سعر الساندوتش ١.٧٥ جنيه و هتدوق طعميه مختلفه تماما عن بتاعت القاهره.
    اخرج و اسال عن طريق كوم الشقافه عشان توصل لتاني مزار و هو عمود السواري.
    نصيحه لو انت طالع يوم جمعه اتمشي احسن من المطعم لعمود السواري و بلاش تركب الترام عشان الطريق ده بيكون زحمه عشان السوق و طريق المقابر فهتلاقي الترام بيقف كتير جدا و تضيع وقت بالرغم من قرب المسافه.
    هتتمشي حوالي ٢٥ دقيقه الي ٣٥ دقيقه و هتنبسط وسط السوق اوي و هتحس عامل زي سوق الجمعه و السيده عيشه.
    هتلاقي حيوانات و طيور واسماك زينه حيه لبيع فهتصور كتير طول ما انت ماشي.
    هتوصل لعامود السواري و هتقعد حوالي من ٤٥ الي ٦٠ دقيقه.
    تخرج تمشي شمال هتلاقي مشروع واقف (ميكروباص) تقوله عايز تنزل المنشيه عند قبر الجندي المجهول و ده هيكون اخر خط المشروع.
    **الاكل
    تنزل اخر الخط و تسال علي مطعم شعبان بتاع السمك
    مكانه بالظبط:
    في المنشيه بعد محطة الرمل قدام فرع البنك الاهلي المصري علي الناحيه التانيه في قهوه هو وراها علي طول.
    و ده محل اسماك شعبي فهتلاقي اسعاره رخيصه جدا
    _كام ملحوظه عشان متضيعش وقت هناك
    مشكله شعبان انك ممكن تستني وقت عشان تعرف تقعد هناك
    فانت اول ما توصل هناك متقفش عند بتاع الكاشير عشان انت بتحاسب بعد الاكل.
    ادخل علي المكان الي بتختار منه السمك
    انا اخترت سمكه بوري تتعمل سنجاري وزنها ٥٥٠ جرام و ده حجم مناسب جدا
    و معاه ربع جمبري مقلي (سعر الكيلو ١٦٠ جنيه)
    هو المحل معندوش غير نوعين جمبري مسلوق و مقلي بس عشان محدش يسال علي بترفلاي او غيره.
    بيديك فاتوره عليها رقم من فوق تاخدها و هتلاقي ناس تبع المحل مسؤوله عن انها تقعدك و هتلاقي راجل مليان اسمه شعبان قله عايز تقعد و هو هيقولك قصادك قد ايه
    نصيحه لو زحمه شويه اطلع اتمشي علي الكونيش و تعاله بعد نصف ساعه طبعا احتفظ بالفاتوره.
    ارجعلوا بعد شويه
    اول ما تقعد هينزل اطباق سلاطات و عيش و دول ببلاش
    هتلاقي راجل شايل صنيه عليها اطباق ارز صياديه لو عايز هينزلك علي الفاتوره ٥ جنيه سعر الطبق.
    في واحد بيكون شايل كوبيات شوربه جمبري و ديه ببلاش .
    بلاش تطلب شوربه سي فود عشان خفيفه جدا و مش هتعجبك لو اكيل سمك
    سعر الطبق ٢٥ جنيه.
    بلاش تطمع و تطلب اكل كتير عشان هتسيب كتير و لسه هتروح تاكل حلو.
    خد بالك الجمبري سواء مقلي او مسلوق بيتعمل في الاسكندريه بقشره.
    حساب
    السمكه مع الجمبري و السلاطات و العيش و شوربه الجمبري ٦٠ جنيه فقط 😃.
    تخلص اطلع اتمشي في شارع سعد زغلول و لو مشمتش ريحه البن الي طالع من كافيه البن البرازيلي يبقي كده انت ماشي غلط ادخل هناك و اطلب اي مشروب بتحبه و متوسط الاسعار ١٦ جنيه الشرب ده اختياري عشان في ناس بعد الاكل مش هتقدر تشرب. فال ١٨ جنيه اختياريه.
    انا طلبت ايس موكا كبير كان ب ١٨ جنيه.
    تخرج تطلع علي الكورنيش و لو لسه عندك علي الاقل ساعتين و نص اركب اتوبيس ب ١ جنيه و قله بحري عند الشيخ وفيق
    هتنزل اقرب مكان و تتمشي ١٠ دقائق و اطلب الحاجه تيك اوي بلاش تقعد عشان الزحمه و الوقت.
    انا طلبت رز باللبن و المكسرات و كان ب ١٣ جنيه.
    زي ما قلت لو عندك وقت علي الاقل ساعتين و نص خد الحاجه و اركب مشروع عكس الاتجاه الي نزلت فيه و قله عايز تنزل عند مسجد المرسي ابو العباس و هتدفع جنيه
    اقعد استمتع بالبحر و اضاءه القلعه بليل و انت بتاكل و اركب من هناك لمحطه مصر و خد بالك يفضل لو هتركب من القلعه لمحطه اركب قبلها ب ساعه عشان المشروع بياخد طريق الكونيش فممكن ياخد وقت عشان الزحمه و هينزلك مكان تتمشي ١٠ دقائق و هتدفع ٢ جنيه.
    لو خلاص ناقص وقت ٤٥ دقيقه خد الحاجه و اركب مشروع بينزلك محطه مصر و هتدفع ١.٢٥ جنيه و ده بيمشي من طريق داخلي فهتوصل اسرع.
    و بكده لو حسبت تكلفه الرحله
    قطار رايح جاي ٦٠ جنيه
    اكل ٣.٥٠ +٦٠ +١٣= ٧٦.٥٠ جنيه
    مزارات: ٢٠ جنيه
    تكلفه الرحله:١٥٦.٥٠ و زود ٣ جنيه اجمالي المواصلات يبقي وقفت الرحله ١٥٩.٧٥ جنيه لو هتضيف المشروب يبقي ١٧٧.٧٥ جنيه.
    كده انت عملت رحله متكامله و غيرت جو و انبسطت
    اتمني الكل يجرب البرنامج ده و يقولي رايه فيه.
    تكلقة الذهاب إلى الأسكندرية من القاهرة - تكلفة الذهاب إلى الأسكندرية - رحلة إلى أسكندرية بدون تكاليف - تكاليف المرواح لأسكندرية - هل الذهاب إلى الأسكندرية مُكلف - هل يُمكن الذهاب إلى الأسكندرية بتكاليف بسيطة - رحلة أسكندرية بتكاليف بسيطة
    تجربة رحلة  إلى أسكندرية يوم واحد فقط بأقل تكاليف مُمكنة بالتفصيل 

    تجربة معتز محمد - برنامج رحلة لأسكندرية غير مُكلفة 

    ده يعتبر البوست التالت الي هتكلم فيه عن الاسكندريه بس المرادي هتكلم عن رحله كذا يوم مش زي رحلات اليوم الواحد الي اتكلمت عنها في البوستين الي فاتوا.
    قبل ما ابدا احب اهدي البوست ده بالذات الي Sasso Eloffy و هي احد الاعضاء الاسكندرانيه الي بتشجع كل المصربين انهم يزوروا مدينه الاسكندريه 😃😃.
    برده احب اقول ان السفر اذواق فمش شرط كل كلمه اكتبها يوافق عليها كل الناس بس عموما احنا بنحاول نشجع الناس علي السفر و الاستمتاع بالوقت.
    اولا الاسكندريه بعتبرها من المحافظات المحظوظه بالمحافظين الي مسكوها الفتره الاخيره عشان فعلا هتلاقي الاسكندريه بتعيش ازهي عصورها السنوات الاخيره و ده هيبان من نظافه الشوارع و التطوير الي بيحصل في المدينه نفسها و استعدادتها لاستقبال ملايين المصييفين كل سنه و مع ذلك هتلاقي عربيات النظافه و عمال النظافه شغالين اول باول عشان يحافظوا علي المنظر الحضاري لمدينه.
    و علي فكره الي هيركز كويس في المدينه ديه هيلاقي ان فيه التزام بنسبه كبيره من جانب اهل الاسكندريه و ده هتلاقيه في التزام الكمسري في الترام باليونيفورم المخصص له الي اتلغي من زمان في القاهره و هتلاقي سائق الاوتوبيسات ليه زي و هتلاقي عامل النظافه ليه زي و الاهم من كل ده انك هتلاقي ملابسهم نضيفه مش متسخه.
    -خلينا نتفق علي كام حاجه (اشاعات الاسكندرانيه عشان يقللوا الضغط الي بيحصل من المصطفين).
    *الي يركز مع الاسكندرانيه الفتره الاخيره هيلاقي ان كل سنه بيطلعوا اشاعه و بيكون الغرض منها تخويف المصطفين من زياره الاسكندريه زي حوار ظهور القروش السنه الي فاتت و السنادي بظهور قناديل البحر بشكل مبالغ فيه.
    +ملحوظه
    هتكلم علي الوقت الي سافرت فيه و كان من ١٠/٧/٢٠١٧
    مش هقول ان مفيش قناديل ظهرت بس مش بالشكل المبالغ فيه و كمان بتختلف من منطقه الي منطقه و كمان ناخد بالنا ان المصدات المعموله داخل البحر مخليه ١٠٪ بس من القناديل الي بتوصل الشط هي الي بتكون عايشه غير كده الباقي بيكون ميت.
    الكلام ده مش تاليف من عندي بالعكس الكلام ده من المنقذين الي موجودين في الشواطئ و الدليل انك هتلاقي ناس نازله البحر لحد الساعه ١١ بليل و زحمه فده اثبات كافي انها مش بالشكل الي بنسمع عنه.
    *اشاعه تانيه ان الاسكندريه زحمه جدا جدا.
    مش كل شوارع الاسكندريه زحمه يعني ممكن نقسمها كدا:
    -منطقه من سيدي بشر الي ابو قير و ديه بنقول عليها المنطقه الشعبيه الي بتتميز باسعار منخفضه جدا و فيها سوق خالد ابن الوليد عشان كده هتلاقيها زحمه جدا فلو انت ملكش في الزحمه ابعد عنها.
    -منطقه سان استفانو الي منطقه بحري و ديه تعتبر اقل في الزحمه بكتير بالمقارنه بالمنطقه الاولي عشان كده هتلاقي المنطقه ديه اسعار الشقق مرتفعه و خصوصا المنطقه الي حوالين مول سان استفانوا
    -السواقه و زحمه العربيات
    مبدايا شوارع الاسكندريه واسعه جدا و اغلبها ٦ حارات و الاشارات الي هناك ٩٠٪ معموله فقط عشان تقفل كل دقيقتين عشان الناس تعدي الشارع و عايز اقولك ان ديه بس الي ممكن توقف الشارع لحد ما الاشاره تفتح يعني محدش يفتكر انها زي الوقفه بتاعت كوبري ٦ اكتوبر و صلاح سالم و رمسيس في القاهره بالعكس الدنيا هناك ماشيه جدا و سكان القاهره بالذات الي هيقدروا يعرفوا يعني ايه زحمه.
    +ملحوظه لناس الي بتطلع بالعربيات او بتاجر عربيات هناك.
    علي الكونيش استحاله تلاقي مكان تركن فيه عشان هتلاقي الونش بيكلبش اي عربيه واقفه في المنطقه عشان كده هتلاقي العربيات بتركن في الشوارع الداخليه داخل جراشات العمارات بس المشكله ان حارسي المكان مش هيسبوك تركن ببلاش يعني هيحط تسعيره اول ساعه ٢٠ جنيه و اي ساعه زياده بتكون حوالي ٥ جنيه و هتسيب غالبا مفتاح العربيه مع المسؤولين المكان هناك و هما هيركنوها او هتطر تدور علي مكان تركن فيه ببلاش و ده محتاج مجهود خرافي عشان تلاقي مكان ببلاش.
    _المواصلات
    *الترام
    هناك المواصلات جميله جدا يعني لو ركبت الترام هتلاقي الكراسي نضيفه جدا و مش بتتاخر في المواعيد و هتلاقي الترام كافيه و ده كافيه معمول داخل الترام و كانت شامله كبايه شاي و بيكون فيها جرسون بس مركبتوش السنادي فمش عارف التذكره وصلت بكام.
    *المشروع(الميكروباصات)
    هناك سواقين المشروع بالمقارنه بسواقين القاهره هتلاقيهم في غايه الاحترام و الاسعار موحده يعني مش هتلاقي اسعار متفاوته زي القاهره و هتلاقي سواقتهم شبه محترمه مش هتحس انك في need for speed زي القاهره و كمان ليهم مكان يركنوا فيه علي جنب مش زي عندنا في نصف الشارع.
    *الاتوبيس السياحي لاسكندريه
    و ده اتوبيس زي ما بنقول الي بدورين و لونه احمر و ده الخط بيبدا من منطقه بحري اخر شارع الشيخ وفيق و عبده فرج بتاع السمك و نهايه الخط بيكون عند المعموره و ده بيلف بيك كورنيش الاسكندريه كله ب ٧ جنيه بس لو دخلت بيه المنتزه فيزود عليك ١٥ جنيه رسم دخول و علي فكره ممكن تنزل في اي مكان في الطريق و ممكن تركبه من اي مكان برده يعني الي اقصده انك مش مرتبط تركبه من اول الخط و مش لازم تاخد الرحله كلها بس حلاوته وقت الغروب و كمان هتلاقيه مشغل اغاني فيروز فهتستمتع غصب عنك
    +ملحوظه
    يفضل تركب من اول الخط عشان تلاقي مكان في الدور العلوي و تعرف تستمتع بالمشهد.
    -اهم الاماكن
    في الاسكندريه في اماكن لو مرحطهاش يبقي ظلمت نفسك و ظلمت الاسكندريه معاك.
    *القلعه
    انت ممكن تقعد عند محيط القلعه علي البلوكات الي هناك و تستمتع برذاذ موج البحر و هو بيخبط فيك.
    -( نصيحه )
    و انت في محيط القلعه هتلاقي ناس بتعرض عليك تركب مركب يلف بيك محيط القلعه و هيقولك هتشوف اماكن تحفه و رحله تحفه بس لاسف ده مش هيحصل عشان بنسبه كبيره الموج بيكون عالي فمش هيعرف يطلع من موحيط القلعه فهضيع فلوسك.
    *مكتبه الاسكندريه
    ناس كتير فاكره انك لو داخل المكتبه فلازم هتدفع رسم دخول ١٠ جنيه و المعلومه ديه غلط
    في اماكن جوي المكتبه زيارتها ببلاش زي متحف انور السادات و ده في الدور الارضي و هتلاقي كل مقتنيات انور السادات حتي البيجامه و معجون السنان و اللبان بتاعه😄😄.
    طبعا انت ممكن تقعد داخل محيط المكتبه تستخدم النت و علي فكره المكان ده هتلاقي سرعه نت عمرك ما شفتها في حياتك عارف السرعه هناك توصل كام؟
    ٥٤ ميجا يعني ممكن تنزل لعبه ٥ جيجا في ٣٠ دقيقه 😄😄.
    طبعا و انت هناك لازم تحضر عرض من عروض القبه السماويه و ديه من اهم العروض الي مينفعش تضيعها و سعر التذكره ب ٢٠ جنيه و هتلاقي حفله بتبدا من ١٠ الصبح و كل ساعه في عرض فيلم مختلف مدته بتتراوح من ١٩ الي ٣٥ دقيقه و بتتفرج علي فيلم ٣٦٠ درجه.
    (نصيحه)
    روح قبل الحفله بساعه عشان ممكن تلاقي رحله مدرسيه حاجزه حافله كامله.
    +ملحوظه
    المكتبه نفسها لو داخلها بتفتح من ١١ الصبح لكن لو هتقعد داخل محيط المكتبه فممكن تروح من من ٩ الصبح.
    -محطه الرمل
    المكان ده علم من اعلام الاسكندريه بس احسن وقت تستمتع بيه في المكان ده هيكون من الساعه ٩ الصبح و اتفرج و صور المباني الي في المنطقه ديه و هتلاقي الشوارع هناك فاضيه فهتاخد رحتك اوي في الاستمتاع و التصوير و طبعا المكان ده مهما اتمشيت فيه مش هتزهق خصوصا لو اكيل و هتكلم عليها بعدين.
    *متحف كفافي
    ده متحف منزلي لشخص يوناني كان من عشاق الاسكندريه و ليه قصه كبيره في الكفاح ضد العدوان الثلاثي وقت الحرب.
    هو مكانه في شارع دانيال اسال اصحاب المحلات هناك هيدلوك عليه و ده هتلاقي بيت عتيق من البيوت بتوع زمان و سعر التذكره ٥ جنيه و طبعا لو عايز تعرف قصته بجد خلي المسؤول هناك يحكيهالك عشان هتلاقي صعوبه انك تفهم المكان لوحدك و علي فكره هيشرحلك ببلاش.
    +ملحوظه
    لو ملكش في قصص الادب بلاش تروح عشان هتزهق.
    - منطقه بحري
    ديه المنطقه الي هتلاقي فيها مراكب الصيد و هتحس انك في اليونان من جمال المنظر
    -Malibu cafe
    لو انت نفسك تقعد في كافيه علي البحر و تكون شايف البحر امامك البحر و اسعاره متوسطه فانصحك بالمكان ده وقت الغروب او بليل قبل الزحمه علي الساعه ٩ مساءا و مكانه في منطقه اسبورتج امام مطعم خواطر دمشقيه.
    +ملحوظه
    متشربش غير ليمون و نبه معلقه سكر عشان بيفتري في السكر و ده سعره ١٧ جنيه بالضريبه ٢٢ جنيه او ممكن زبادي بالفاكهه و العسل و ده ب ٣٠ جنيه بالضريبه ٣٥ جنيه غير كده اي حاجه هناك مش هتعجبك.
    -البن البرازيلي
    و ده يعتبر عاصمه الاسكندرانيه يعني لازم تعدي عليه و تشرب قهوه من عنده او كابيتشينو او موكا و تضرب معاهم تشيز كيك توت او كريز💗
    +ملحوظه
    روح المكان ده و استمتع بيه بجد من الساعه ٧:٣٠ الصبح و اقعد في الدور التاني.
    اسعاره متوسطه.
    العنوان: هو ليه كذا فرع بس انا بتكلم عن فرع محطه الرمل.
    -لسان شاطئ جليم
    لو بتحب تتمشي علي البحر فانصحك بليل تتمشي داخل اللسان و ده دخوله ببلاش بس بلاش الصبح عشان زحمه المصيفين.
    نتكلم بقي عن مناطق الكل المهمه و نصيحه بلاش نعتمد علي اماكن واخده اسم و خلاص و جرب اماكن تانيه و جديده و مش هتندم.
    ***اهم مناطق الاكيله
    *محطه الرمل
    هناك هتلاقي اعمده في عالم الاكل الشرقي المصري زي:
    -محمد احمد بتاع الفول و الطعميه
    طبعا لو ناوي تقعد فالقاعده هناك بلاش تروح ايام الجمعه و السبت عشان الزحمه و هتستني كتير و كمان في مشكله ان الطلبات الي هتنزل جوه عباره عن اطباق فهتلاقي نهايه القاعده بتدفع مبلغ و قدره علي فول و طعميه و خصوصا ان مفيش سندوتشات داخل المحل بس فيه جزء خارج المكان مخصص لسندوتشات فانصحك عشان مضيعش وقت هناك انك تعتمد علي السندوتشات و مش هتندم
    -كبده الفلاح
    و ده من الاماكن الي مينفعش تاكل منها كبده و سعر الرغيف كامل ٥ جنيه و النص ب ٢.٥٠
    -الحلبي
    عم حلبي ده مكان ٢ متر في ٢ متر هتلاقيه جنب كنتاكي محطه الرمل عند الترام
    اضرب قطعه هريسه بالسمنه البلدي بالمكسرات و القشده ب ١٣ جنيه القطعه
    -المطعم الدمشقي فيروز
    لو اكيل فته سوري فلازم تاكل فته حمص بالشاورما ب ٢٥ جنيه و مش هتقدر تخلصها حتي لو اكيل بس خفيفه.
    -عسليه زمان
    و ده لو اكيل فريسكا فهتلاقي عربيه صغيره عليها شخص بيعمل فريسكا طازه و عسليه
    سعر الفريسكا الساده ١ جنيه و الي بالعسل ١,٥٠
    العنوان: تقاطع الفلكي مع سعد زغلول في محطه الرمل
    *اكيله السمك
    - لو عايز اكل شعبي و رخيص بغض النظر عن شكل المكان و طريقه التقديم فانصحك بشعبان بتاع السمك بس ده نوعيه الاطباق محدوده جدا نظرا انه شعبي و ده في منطقه محطه الرمل
    عروس البحر
    طبعا ده من الاماكن المميزه في الطعم عشان كده تلاقي اسعاره عاليا شويتين.
    العنوان:بحري عند مسجد ابو العباس
    -7 seas
    و ده في منطقه ابو قير جنب زفير بس بصراحه هو موقع تحفه بس اكل اقل من العادي جدا.
    -اكيله الجبن
    طبعا اول ما تقول لحد عايز جبنه سايحه هيقولك البان سويسرا و طبعا ديه اكبر غلطه و بتضيع نفسك لو انت اكيل.
    عشان كده هقولك جرب مطعم طاسه عند سموحه جنب محل عصير مكه
    -لو اكيل جيلاتي
    طبعا هتلاقي عزه تحت كل بيت في الاسكندريه بس لاسف انت كده مش اكيل و لا حتي جيلاتي بيروت و جرب جيلاتي مكرم و هتلاقي منتشر بس الي فاكره فرع سيدي بشر.
    -لو شريب عصائر
    مضيعش وقت مع خروب امال و دور علي خروب كليه طب و هتلاقي فرع ناحيه خالد ابن الوليد
    -لو اكيل رز بلبن بالمكسرات و القشده و الايس كريم
    انصحك بلاش صابر مش عشان وحش بس عشان الكميه قليله و غاليه جدا بس انصحك بالشيخ وفيق في بحري و لو اكيل كسكسي فهتنبسط جدا😉😄.
    كده احنا غطينا اهم الاماكن بس فيه كام ملحوظه اختم بيها البوست ده
    -اسعار القطارات الدرجه التانيه المميزه بتبدا من ٣٠ جنيه رايح او جاي بس مش كل الرحلات
    يعني من القاهره رحله ٨:١٥ صباحا و ١٠ صباحا
    رجوع من الاسكندريه ٩:١٥ مساءا.
    - الاسكندريه بلد نضيفه فخليكم مصيفين خفاف علي اهلها و بلاش تلوثوها عشان الكل يستمتع.
    -لو عايز تنزل البحر في مكان نضيف
    فانصحك تنزل في شط ٢٦ يوليو في سان استفانوا بتاع القوات المسلحه و سعر التذكره مدني ٤٠ و الي تبع القوات المسلحه ١٠ جنيه.
    مستني رايكم في البوست و تجربتكم.

    تجربة معتز محمد الجزء الرابع - رحلة يوم واحد للأسكندرية غير مُكلفة على الإطلاق

    البوست ده هيكون رقم 4 الي هتكلم فيه عن الاسكندريه خصوصا ان احلي جو لاسكندريه هو اليومين دول بس المرادي الرحله هتكون ملائمه اكتر لناس المرتبطه او المتجوزه و بدون اطفال عشان هتلاقي الرحله مودها رومانسي شويه و برده مش هتكون مكلفه و مختلفه تماما عن رحلات الاسكندريه الي كتبت عنها قبل كده.
    المواصلات:
    *القطار
    لحد دلوقتي و انا بكتب لسه تذكره القطار بتاع 8:10 الصبح ب 30 جنيه و ده قطار مكيف و نضيف جدا بياخد الطريق في 3 ساعات تقريبا عشان بيعدي علي كذا محافظه.
    (نصيحه)
    احجز دايما رايح جاي من المحطه بلاش تروح تحجز واحده من القاهره و تروح هناك تحجز رجوع من الاسكندريه عشان ممكن متلقيش فامن نفسك من القاهره دايما.
    -في قطارين بسعر 30 جنيه رجوع من الاسكندريه و الاتنين الطريق 3 ساعات
    +قطار 20:10
    +قطار 21:15
    ملحوظه مهمه
    -انت لو هتاخد مخاطره انك تحجز و انت واقف تذكره انك تطلع علي القطار الي هيتحرك دلوقتي ممكن بنسبه 95٪ متلقيش تذكره
    بس لو عايز تركب القطار ده فممكن تطلع عادي القطار من غير تذكره و هتلاقي المحصل بيدفعك تمن التذكره و عليهم 6 جنيه غرامه
    بس المشكله ممكن متلاقيش مكان تقعد فهتطر تقعد علي الارض في فواصل العربيات و ديه امان طبعا و مقفوله بس الفكره لو هتقعد جنب المراحيض فهتفقد حاسه الشم.
    *المايكروباص
    و ده حل بديل من امام محطه القطار هتلاقي ناس بتنادي بتقول الاسكندريه و بتكون مايكروباصات مكيفه و نضيفه بس و سريعه بتاخد الطريق في ساعتين تقريبا.
    - العيب الي في الموضوع
    انك بتستني لحد ما يحمل العربيه و سعر الفرد 45 جنيه.
    الوصل الي الاسكندريه:
    +الفطار في مطعم جاد
    طبعا لو بتفكر تفطر فممكن تجرب مطعم جاد و ده رمز من رموز الاسكندريه في الاكل المصري و الي مختلف تماما عن بتاع القاهره سواء نضافه او طعم.
    هتلاقي كذا فرع منه الي عند كوبري استانلي و في الي في المندره علي البحر.
    اطلب من عنده طعميه محشيه بسطرمه و بطاطس بالجبنه الموزاريلا و طبق واحد فول اسكندراني و طبق جبنه بالطماطم و بينزل عيش سخن معاهم.
    هنا الاطباق كبيره جدا فبلاش تطلب كتير عشان مش هتخلص الاكل
    التكلفه حوالي 65 جنيه.
    +جوله بحريه
    تركب مشروع من اي مكان هناك رايح علي بحري و تنزل عند القلعه و هتلاقي و انت ماشي جنب محل جيلاتي عزه مكان تركب فيه مركب تلف معالم الاسكندريه بيكون حوالي 45 دقيقه بس ممتعه.
    هو هيبدا بسعر 150 جنيه لمركب كلها بس نزل معاه علي قد ما تقدر فقدرت انزل لي 130 و كنا حوالي 8 افراد فكل واحد دفع 15 جنيه و بتكون مركب بمظله و بيشغل اغاني لو حابب فهتنبسط جدا منها.
    هناك في منطقه بحري هتلاقي مراكب اصغر و بيعرض عليك تطلع الفرد ب 20 جنيه بس انا مجربتهاش معاهم.
    +القلعه
    هتخلص الرحله اطلع اتمشي في محيط القلعه و اتصور و ادخل القلعه ب 10 جنيه و تقعد حوالي ساعه تقريبا.
    +الغذاء في مطعم طاسه
    هتلاقي نفسك جعان فهتركب اي مشروع رايح محطه سيدي جابر و تدخل المحطه تطلع ناحيه سموحه هتلاقي هناك مطعم جاد و قصاده منطقه مطاعم و من ضمنها مطعم طاسه و ده اجمل من البان سويسرا سواء جوده او كميه.
    اطلب من هناك طاسه كوردون بلو و طاسه سدق
    ناخد بالنا الطاسه الواحده تكفي فردين الي تلاته و كمان بينزل عيش و سلطات غريبه و حلوه تلكمك قبل ما تاكل الوجبن نفسها فهتسيب اكل كتير حتي لو اكيل.
    +اسكاي روف باراديس ان
    تخلص اكل تطلع قبل الغروب علي فندق paradise inn جنب محطه الرمل شارع الشهداء و تدخل الفندق و تطلع sky roof و ده عالم تاني هتحس انك قاعد جوه البحر و القاعده و الفيو روعه.
    *ملحوظه
    هتلاقي اسكاي روف ده مقسوم الي دورين
    دور المينيمم ب 90 جنيه و الدور التاني ب 200 جنيه
    الفرق ان الدور التاني بيقدم خمور و بيره لكن الدور الاول من غير.
    طبعا 90 جنيه يكفوا انك تاكل و تشرب عشان مش غالي زي ما متصور بس الكميه في الاكل قليله طبعا بس المشروبات حجمها كبير جدا.
    تعمل حسابك هتدفع بالضريبه 120 جنيه بس هتخرج فعلا مبسوط.
    طبعا تقعد لحد معاد القطار بتاعك و تنزل ترجع القاهره بلد الضباب و الاكتئاب و تعرف انك كنت في حلم جميل و يوم هيفرق معاك جدا.

    أشهر وأفضل مطاعم الأكل في الأسكندرية وأسعارهم 

    من خلال البوست ده هتكلم عن اشهر محلات واخده بروباجنده كبيره علي الفاضي بالرغم انها اقل من العادي و تكاد تكون الاسوء من وجهه نظري الشخصيه بس هتكلم عن البديل الي بيوفر طعم و جوده احسن.
    قبل ما ادخل في الشرح احب اوضح ان الاكل اذواق فممكن ناس تتفق و ناس تختلف معايا في الراي.
    اولا: البان سويسرا
    خلينا متفقين ان ٧٥٪ من الي بيسافروا الاسكندريه بيكون اختيارهم الاول هو البان سويسرا.
    لاسف البان سويسرا ميعتبرش الاحسن بل العكس هو اقل المستويات ممكن بدايه شهرته هو انه من اوائل المحلات الي دخلت موضوع الطاسه بالجبنه السايحه و مكنش في منافس ليه فبالتالي الناس مقدرتش تعرف الطعم البديل الي ممكن يفرق معاهم في الجوده و الطعم.
    بس انا جايب البديل و هو محل اسمه طاسه كل حاجه بالجبنه:
    ده عنوانه: كارفور سموحه خلف محطه سيدي جابر لقطار جنب محل عصير مكه
    الي جرب البان سويسرا انصحه يروح يجرب طاسه هيعرف ان المحل ده بيستخدم جوده اعلي في الجبنه و الخلطه بتاعت الشيش طاووق و السدق.
    ثانيا جيلاتي عزه
    من اشهر محلات الجيلاتي المنتشره في الاسكندريه لدرجه انك ممكن تحس ان تحت كل عماره جيلاتي عزه.
    بصراحه انا جربته في كذا مكان و كذا محافظه بس لاسف ملوش اي طعم و سكر الجيلاتي عالي جدا فمش هتحس انك هتاكل حاجه ليها طعم مميز هو سكر مثلج بطعم الليمون او الفراوله او المانجه.
    البديل هيكون جيلاتي مكرم و ده هتلاقي فروع ليه كتير بس الي اتذكره فرع سيدي بشر.
    ثالثا خروب امال
    ناس كتيره بترشحه علي انه طعم مميز بالرغم ان طعم عصير الخروب بتاعه سكره عالي جدا فتحس انه عامل زي عصير فيتراك المركز الي بيتخفف بميه.
    البديل ممكن الاحسن منه و حلو هو مشروبات كليه طب بيكون السكر مظبوط فعلا و في طعم واضح لعصير و هتلاقوا كذا فرع منهم القريب من منطقه خالد ابن الوليد.
    رابعا seven seas
    و ده من المطاعم المشهوره جدا في ابو قير بس لاسف طعم الاكل البحري بتاعه ملوش طعم مميز يخليك تحس انك اكلت اكله سمك محترمه في الاسكندريه و انصح لو انت اكيل مكرونه سي فود متحربهاش من عنده عشان هتلاقي طبق مكرونه فقط
    شوربه السي فود متوسطه الطعم
    الحلو عنده خلطه الجمبري المشوي
    السمك السنجاري الخلطه تعبانه جدا.
    الي يشفع لمحل ده قاعدته المميزه علي البحر
    البديل انا شايف عروس البحر و ده مكانه عند بحري عند مسجد ابو العباس.
    خامسا صابر
    زمان صابر كان ملك الرز بلبن و المكسرات و القشده بس لاسف الفتره الاخيره تراجع مستواه سواء في الطعم و الكميه و السعر
    يعني طبق رز بلبن بالمكسرات و القشده كان ب ٢٠ جنيه و طبق كان صغير جدا
    البديل الشيخ وفيق
    بصراحه الطبق بتاعه كبير جدا و الطعم حلو و تعرفه من جوده اللبن.
    الشيخ وفيق مميز بالكسكسي و شويه السمنه و اللبن الي عليه.
    مكانه بحري جنب عبده فرج بتاع السمك

    سادسا المطعم السوري خواطر ديمشقيه
    مكانه عند منطقه سبورتج و بصراحه تتبيله الشاورما ضعيفه و الكميه قليله جدا
    البديل مطعم الفايروز و ده مكانه عند محطه الرمل و انصح لو اكيل المطبخ الشامي فكل من عنده فته حمص بشاورما فراخ.
    الكميه و الطعم حلوين جدا.

    حجز القطار إلى الأسكندرية أون لاين في مصر 

    ناس كتير متعرفش ان في موقع مخصوص لحجز القطارات في مصر online و انك مش لازم تروح رمسيس مخصوص عشان تحجز.
    من خلال البوست ده هتكلم عن كل ما يخص الحجز و السعر.
    قبل ما اتكلم عن الموقع حابب اتكلم بشكل عام عن طرق حجز القطار في القاهره
    اولا: محطه رمسيس
    بتروح تحجز التذكره بالسعر الرسمي لقطار يعني مثلا
    قطار درجه تانيه مكيف بيقوم من القاهره الي الاسكندريه الساعه 8:10 صباحا سعره 30 جنيه
    ثانيا:الحجز من مكاتب السنترالات
    ناس كتير متعرفش انها ممكن تحجز من مكاتب السنترال (التابعه لمصريه لاتصالات) زي سنترال الماظه في مصر الجديده و السيده زينب و .... ..... بيكون في مكتب حجز قطار بس ده تذكرته اغلي ب 5 جنيه يعني تذكره الاسكندريه من القاهره في قطار 8:10 صباحا بيكون ب 35 جنيه
    ثالثا و ده الاهم الحجز online
    ده موقع مهم جدا و امن بتقدر من خلاله تشوف كواعيد القطارات و الدرجه الي محتاجها و سعرها.
    -كل الي عليك هتدخل علي موقع enr.gov.eg و هتلاقي علي الشمال تسجيل دخول
    -هتدخل بيناتك كامله و رقم سري و ايميلك و رقمك
    - هتدخل عادي بالحساب الجديد بتاعك و هتلاقي اعلي الصفحه الجدول الزمني لقطارات
    -هتكتب محطه القيام منين و محطه الوصول فين
    -تاريخ السفر
    -درجه القطار (اولي او تانيه مكيف)
    -وقت القيام (سيبه فاضي)
    -نوع التذكره (تذكره كامله)
    بعض كده هتعمل عرض
    هيظهر كل مواعيد القطارات الي فيها حجز
    *ملحوظه
    لو ملقتش مثلا قطار الساعه 8:10 صباحا معني كده مفيش اماكن فيه
    ركز كويس عشان هتلاقي 8:10 ص و 8:10 م و ده طبعا صباحا و مساءا.
    السعر online اغلي من سعر التذكره في المحطه ب جنيه و نص يعني قطار الاسكندريه الساعه 8:10 ب 31.50 جنيه
    هتختار القطار الي انت عايزه و تعمل حجز
    هتدخل اسمك و رقم البطاقه او الباسبور
    هتدخل بعد كده علي عمليه الدفع و هيطلب تدخل رقم الكريدت كارد (امان 100%) و هيتبعت ايميل اطبعه و اطلع رحلتك
    -ملحوظه
    مش لازم الكارد الي حجزت بيه يكون باسمك و مش لازم يكون معاك في القطار هو اهم حاجه الورقه و لو نسيت البطاقه مش مشكله.
    -رابعا تطلع القطار بدون حجز
    وديه نقطه مهمه حبيت اوضحها في الاخر عشان متستخدمهاش غير في الضروره.
    انت ممكن لو ملقتش حجز في قطار محدد ممكن تطلع القطار بدون سابق حجز
    بس عيوبها انك ممكن متلقيش كرسي فاضي فتفضل واقف في فواصل القطار و تقعد علي الارض
    هبعدي المحصل عليك و يقولك تذكره فقله هشتري
    هيدفعك تمن الدرجه الي واقف فيها و عليها غرامه ب 6جنيه بجانب تمن التذكره.
    يعني تذكره الاسكندريه 8:10 ب 36 جنيه.

    أفضل مطاعم وكافيهات أسكندرية 

    تحدثنا في الفقرات السابقة عن أماكن للتوفير وحلات يُمكن عملها في أسكندرية 
    بطرق موفرة للغاية، فما رأيك إذا أردت أن تصرف المزيد من المال، في اماكن رائعة أخرى 
    في الأسكندرية 
    يُمكنك أن تُشاهد هذا المنشور الذي يتحدث عن أفضل المطاعم والكافيهات في الأسكندرية 
    بالصور 
    لينك المنشور : من هنا

    شواطئ الأسكندرية وأسعار الدخول  

    الشواطئ في الأسكندرية كثيرة وجميلة جدًا، ولكننا سنحدثكم عن الأفضل
    ونُرشح لكم شاطئ فُندق توليب والدخول إلى الشاطئ بـ 100 جنية فقط 
    تكلقة الذهاب إلى الأسكندرية من القاهرة - تكلفة الذهاب إلى الأسكندرية - رحلة إلى أسكندرية بدون تكاليف - تكاليف المرواح لأسكندرية - هل الذهاب إلى الأسكندرية مُكلف - هل يُمكن الذهاب إلى الأسكندرية بتكاليف بسيطة - رحلة أسكندرية بتكاليف بسيطة
    تجربة رحلة  إلى أسكندرية يوم واحد فقط بأقل تكاليف مُمكنة بالتفصيل 
    وهذه صورة من الشاطئ الرائع 
    وهناك شاطئ أخر وهو:

    الناس اللى بتقول مفيش أماكن شواطئ كويسه فى الاسكندرية
    ايه رأيكم فى المكان ده بالشياكة دى علشان بس محدش يقول أسكندرية مفيهاش شواطئ حلوه فى الصيف
    شاطئ waves بمنطقة سيدى بشر والشاطئ خاص بفندق هيلتون بس مسموح بدخوله عادى
    سعر الدخول للشاطئ للفرد ٣٠٠ شامله أكل ومشروبات ب ١٥٠ جنية
    تكلقة الذهاب إلى الأسكندرية من القاهرة - تكلفة الذهاب إلى الأسكندرية - رحلة إلى أسكندرية بدون تكاليف - تكاليف المرواح لأسكندرية - هل الذهاب إلى الأسكندرية مُكلف - هل يُمكن الذهاب إلى الأسكندرية بتكاليف بسيطة - رحلة أسكندرية بتكاليف بسيطة
    تجربة رحلة  إلى أسكندرية يوم واحد فقط بأقل تكاليف مُمكنة بالتفصيل 
    وخميس وجمعه وسبت ب٣٥٠ وشامل برده ١٥٠ جنيه مشروبات واكل
    الاطفال من ٠ : ٥ مجانا
    ومن ٦ : ١١ بنصف التمن
    الوقت بيبقى من ٩ صباحا ل ٦ المغرب
    وممكن تأجروا البرجوله اللى فى الصور دى ب ١٥٠ جنيه
    وهذه صور للشاطئ


    تكلقة الذهاب إلى الأسكندرية من القاهرة - تكلفة الذهاب إلى الأسكندرية - رحلة إلى أسكندرية بدون تكاليف - تكاليف المرواح لأسكندرية - هل الذهاب إلى الأسكندرية مُكلف - هل يُمكن الذهاب إلى الأسكندرية بتكاليف بسيطة - رحلة أسكندرية بتكاليف بسيطة
    تجربة رحلة  إلى أسكندرية يوم واحد فقط بأقل تكاليف مُمكنة بالتفصيل 
    والآن نحن إنتهينا تقريبًا من الحديث عن البرنامج الكامل للذهاب إلى الأسكندرية في رحلة شيقة في يوم واحد
    تحدثنا عن أفضل الشواطئ
    وأفضل المطاعم
    وحجز القطورات وكُل شيء تقريبًا في هذا المقال
    ويجب أن نشكر صاحب التجربة وهو الأستاذ معتز محمد 
    ونتمنى أن تشاركونا تجاربكم أيضًا في السياحة أو الذهاب إلى أماكن بعينها، أو أي تجربة في أي مجال أخر
    ننتظركم، وننتظر رأيكم في التجربة.

    إرسال تعليق

    ننقل تجاربنا إليكم
    لطلب النسخة الورقية من أي رواية لتصلك حتى باب منزلك 
    والدفع بعد الاستلام 
    يُمكنك أن تطلبها عبر الواتساب : 01113759893